Անտառներ

2007 թվականին ATP-ն նախաձեռնեց հավակնոտ մի նախագիծ՝ տնկել անտառ Լոռու մարզի Ֆիոլետովո գյուղի մոտակայքում: Անտառի գաղափարը կյանքի կոչվեց ի հիշատակ հայ լրագրող Հրանտ Դինքի։ Նա 2007 թվականին սպանվեց Թուրքիայում իր  գործունեության, իր հայ լինելու համար: Այս նախագիծը ոչ միայն դարձավ հարգանքի տուրք Դինքի հիշատակին, որը ճշմարտության և  իրավունքի մարտիկ էր, այլև դարձավ յուրօրինակ խրախուսանքի օրինակ բնապահպանության ոլորտում:

Վերջին երկու տասնամյակների ընթացքում այստեղ աճել և բարգավաճել են այնպիսի ծառատեսակներ, որոնք կատարում են անտառին բնորոշ բոլոր ֆունկցիաները․ նպաստում են կենսաբազմազանությանը, կանխում հողի էրոզիան և ստեղծում առողջ էկոհամակարգ:

Առաջիկայում ATP-ն անտառի կառավարումը կհանձնի Ֆիոլետովո համայնքին։ Սա կլինի մեծածավալ բնական ռեսուրսների համատեղ կառավարման առաջին համայնքային նախագիծը: ATP թիմերը համայնքին կփոխանցեն անտառի կառավարումը՝ նրա հետ անցնելով անհրաժեշտ բոլոր փուլերը՝ իրականացնելով կարողությունների զարգացում և դասընթացներ, համայնքի հետ սերտ գործակցությամբ մշակելով կառավարման 10-ամյա պլան:

Հրանտ Դինքի ՀուշԱնտառը իր հիմնադրմամբ ճանաչվեց որպես նորարարական նախագիծ։ Եվ դա եղավ մեծ գործի սկիզբը։

2007 թվականից ի վեր ATP-ն հիմնել է ավելի քան 35 նոր անտառ Հայաստանի տարբեր համայնքներում՝ փոխելով նաև տեղի համայնքային կյանքը և ձևավորելով նոր մոտեցում դեպի բնությունը: